ހޯނޑެއްދޫ ކައުންސިލާއި އެރަށުގެ އެކި މުއައްސަސާތައް ގުޅިގެން މިއަހަރުގެ އަޟްޙާ ޢީދު ފާހަގަކުރުމުގެ ގޮތުން ބޭއްވި ކުޅިވަރު މުބާރާތްތައް ވަނީ ކާމިޔާބުކަމާއެކު ނިންމާލާފައެވެ. މި ހަރަކާތްތައް ކުރިއަށް ގެންގޮސްފައިވަނީ 6 ޖޫން އިން 10 ޖޫން 2023 އާ ހަމައަށެވެ.

މި އަހަރުގެ އީދު ކުޅިވަރުތަކުގައި އީދު ސައި، މަންޑި، ކުޑަކުދިންގެ ހަވީރު، މަގުމަތީ ކުޅިވަރު، މަސްރޭސް، އަންހެން ޕެރޭޑް، ކުޑަކުދިންގެ ތްރީ އޮން ތްރީ، ޢީދު ކެއުން، ބައިބަލާ އަދި ގޯނިބޭ (ފިރިހެނުންގެ މާލި) ފަދަ ގިނަ ހަރަކާތްތަކެއް ހިމެނެއެވެ. މީގެ ތެރެއިން ބައިބަލާ މުބާރާތަކީ ގދ. އަތޮޅުގެ ޓީމުތަކަށްވެސް ބައިވެރިވުމުގެ ފުރުސަތު ދީފައިވާ މުބާރާތެކެވެ.

މި އަހަރުގެ އީދު ކުޅިވަރުތަކަށް މީޑިއާ ޕާޓްނަރެއްގެ ގޮތުން އުރީދޫ މޯލްޑިވްސްއިން ވަނީ ފާހަގަކޮށްލެވޭ އެހީތެރިކަމެއް ފޯރުކޮށްދީފައެވެ. އެގޮތުން 10،000 ރުފިޔާގެ ގްރާންޓަކާއި، 5 މައި ފައި ގިވްއަވޭ އަދި އިވެންޓް ލައިވް ކުރުމަށް އެއަރ ފައިބަރ ކަނެކްޝަނެއް ވަނީ ހަދިޔާކޮށްފައެވެ.

"އެހެން އަހަރުތަކާ ޚިލާފަށް މިއަހަރު ދަރުމަވެރިންގެ ބައިވެރިވުން ވަރަށް ބޮޑުކަން ފާހަގަކުރެވުނު،" ކައުންސިލުން މަޢުލޫމާތު ދެއްވިއެވެ. މި ހަރަކާތްތަކަކީ ރަށުގެ އެކުވެރިކަމާއި އެއްބައިވަންތަކަން އާލާކޮށް، އިޖްތިމާޢީ ގުޅުން ބަދަހިކުރުމަށް މުހިންމު ދައުރެއް އަދާކުރާ ހަރަކާތްތަކެއް ކަމުގައި ފާހަގަކުރެވެއެވެ.

ހޯނޑެއްދޫ ކައުންސިލުން ވިދާޅުވި ގޮތުގައި މި ހަރަކާތްތައް ވަނީ އަމާންކަމާއި އޮމާންކަމާއެކު ކުރިއަށްގެންގޮސް، ކަނޑައެޅި މަޤްޞަދުތައް ޙާޞިލުކުރެވިފައެވެ. އަދި މި ހަރަކާތްތަކުގެ ތަޖުރިބާއިން ލިބުނު ފިލާވަޅުތަކުގެ އަލީގައި ކުރިއަށް އޮތް އަހަރުތަކުގައި އިތުރަށް ރަނގަޅުކުރަންޖެހޭ ކަންކަން ވެސް ވަނީ ފާހަގަކުރެވިފައެވެ.